نجم الأهلي السابق يهاجم هاني رمزي: «وقفت المصلحة فسقطت الأقنعة»

هاجم أحمد أبو مسلم، لاعب الأهلي السابق، هاني رمزي، مدير إدارة الكشافين بالنادي الأهلي السابق، الذي خرج في تصريحات هاجم خلالها العديد من المسؤولين بالنادي، عقب رحيله من منصبه.

«أبو مسلم» ينتقد هاني رمزي 

وقال أحمد أبو مسلم عبر صفحته على منصة «فيس بوك»: «وقفت المصلحة فسقطت الأقنعة، اليومين اللي فاتوا شاهدت بعض التصريحات لبعض الناس الموجودة، وكان لها دور في النادي الاهلي سابقا، فلازم نفهم ونحلل واحدة واحدة كل واحد عمل إيه».

وأضاف اللاعب السابق: «أولا يا كابتن، حضرتك كنت مسؤول في لجنة من لجان النادي، وجبت شوية لاعيبة أفارقة مينفعوش يلعبوا في دورة رمضانية، وحملت النادي مبالغ كبيرة، ولا واحد لعب فيهم، حتى اللي لعب في نادي اتصالات، النادي مشاه».

وأوضح: «جلست كام سنة شغال في نفس المكان، وبتاخد مرتب من غير دور زي ما حضرتك بتقول، يبقي كنت بتقبل الفلوس دي ليه؟، كنت تمشي لو عندك احترام لرؤيتك وشغلك زي (محمد رمضان)، اعترض فمشي محترم، حضرتك جلست كام سنة بتاخد فلوس من غير تعب».

أحمد أبو مسلم: ما حدث عدم احترام وأمانة 

وتابع أحمد أبو مسلم: «أنت اشتغلت في قناه النادي كام سنة مع مجلس الإدارة الحالي، وفي الآخر أنت والكابتن التاني بتنتقدوا وتقولوا أسرار محدش يقولها».

واستمر «أبو مسلم» في انتقاده، قائلا: «حضرتك سافرت كام مرة إفريقيا، كان فيهم مصاريف جيب قد إيه وإقامات وفنادق وأكل وشرب وطيران، ده كله من خير النادي الأهلي، والناس اللي كنت شغال معاهم ووثقوا فيك».

وأضاف: «من عدم الاحترام والأمانة، إنك تطلع تقول وتخص مؤسسة كنت تعمل بها قبل رحيلك، للآسف الكلام ده لمجلس إداره النادي الأهلي، اختياراتكم لازم تكون أصحاب ثقه وليس المقربون، والناس اللي أنتوا اخترتوهم أول ناس تنصلوا من المسؤولية ونطوا من المركب».

وتابع: «كلمة الكابتن صالح سليم، الأهلي فوق الجميع مش شعار، الأهلي فوق مصالحكم وليس العكس، هيفضل النادي الاهلي كبير بجماهيره وأولاده المخلصين، ومجلس الإدارة نصيحة لا تثق في لاعب كرة قدم أو مدرب أو وكيل إلا من رحم ربي.. شكرا ولنا عودة».